文化大餐，越丰盛越好
南都网 南都网
2011-01-18
摘要：话说五仙观近日推出文化大餐，节目包括粤剧、讲古等，供市民参观欣赏，呢个举措非常好。
□江晖(朱紫横街)
话说五仙观近日推出文化大餐，节目包括粤剧、讲古等，供市民参观欣赏，呢个举措非常好。首先唔讲文化大餐所包含嘅内容多姿多彩，原汁原味嘅老广味道，勾起几多街坊嘅岁月回忆，单就五仙观呢个古迹嚟讲，呢次活动，无疑都系一个非常好嘅推广。
唔似三元宫、纯阳观、黄大仙呢啲可以祭祀祈福嘅大型道教场所，五仙观虽然都属于道教福祉，但呢度祭祀气氛唔浓，去嘅人大多数系作一般性参观。五仙观又的确系一个游览佳处，其处于闹市，却系闹中一点静，面积虽然唔算大，但山水楼阁俱备，系炎夏一个避暑胜地。夏天我都经常去里面嘅大树底下乘凉嘎。
五仙观承载好多传说，大家又知道几多呢？呢啲传说同广州、同道教都有密不可分嘅关系，就观内嘅嗰口广东第一大钟，挂住佢嘅嗰条绳———当然而家系用铁链挂，就有住几个传说，有话系条蛇，有话系吕洞宾条葛藤等，传说本身，已经系一种文化。
其实，主办方可以藉今次推出文化大餐嘅机会，将观内所有景观嘅有关传说收集推广。而家周时讲要推广传统风俗、传统文化，今次活动，除咗喺里面宣传老广文化外，都应该宣传五仙观承载嘅传说，甚至道教文化。
道教始终发源于中国，信唔信一回事，知多啲总系有必要嘅，好似城隍庙嘅道教宣传栏咪做得几好。市民总唔会嫌弃大餐过于丰盛嘎。
|
京公网安备 11010202006208号